أحمد البرغوثي


أحمد البرغوثي هو أحد أشهر الشعراء الشعبيين بالجنوب التونسي ، عاش في الثلث الأول من القرن العشرين، وتوفي عام 1934. وهو ينسب إلى قرية البرغوثية التابعة إلى ولاية قبلي. كتب الشعر في أغراض متعددة، وامتاز شعره بقوة الصورة وحبكة الكلمات وبلاغتها. من أبرز قصائده "حبيب ال زرعلي في ضميرى غُصّه".


حبيب ال زرعلي في ضميري غُصّه **من كبدتي منبت غلاه نقُصّه
***
حبيب ال زرعلي في الضمير حسيفه ** من غير ما درتش معاه احساف
نحساب ما عندي حبيّـب كيفه ** و نحساب حبّه ما معاه خلاف
حطّيت قدره فوق رأس حديفه** و هزّيت ثقله فوق م الأكتاف
و فرشتله فوق الحصير قطيفه ** و بسطتله طرز الحرير أصناف
عامين و الثّالث يحول خريفه ** في طاعته نجري بلا توقاف
إاذا غاب نبكي بالدموع سخيفه ** إذا مرض نتمرض بلا تسخاف
هذاك حدّي فوق من تشريفه ** وهذاك حدي فوق م التشراف
و جريت جريه من قداه نظيفه ** نحساب ما عدتش معاه نخاف
حياني الحيا جابد عليّ سيفه ** وزود ضربني لا استحى لا راف
نستاهل التّعزير و التطويفه ** و نستاهل التكتيف و التشعاف
ونستاهل يديرو عليْ تخريفه ** آش قالك مجنون رأسه خاف
أنا زهفت و خلوق الصغير زهيفه** رمتني على صحبة عباد قصاف
ولّيت مستهزب و واكل جيفه ** و ندمت ولحقني الندم بالزّاف
————
لحقني الندم بــــــــــــــــزايد ** و كويت فوق ايدي ثلاثة جرايد
و شعفت من بني الحجر البايد ** شهرين يتقضقض يصوّب رصّه
نوصيك يا مغفول باري حايد ** و اللّي انكوى بالنّار ما يتوصّى
حبيب ال زرعلي في ضميري غُصّه ...
***
حبيب ال زرعلي في ضميري علّه ** تشغشب دليلي ما بقيت اندل
نحساب ما درتش معاه الزّله ** و ما نحسبه طول الزمان يزل
ملكت له عقلي خذاه بكلّه ** و جوجيت له بين الجواجي حل
فرّغت له قلبي نزل في ظلّه ** محال لا واحد معاه نزل
في طاعته نجري نعم باسم الله ** وفي خدمته نخدم بغير ملل
عامين ما ندري ثلاثة والله ** جمعت محسبهم عليّ ظل
عدّيتهم بين الصغى و الذّله ** وشربت مرّار الحبيب عسل
عل خاطره حملت القطر و البلّه ** و خشّيت في غارق الطّين وحل
نحساب لا خاب الزمان وخلّى** نلقى حبيبي ما معاه خلل
حياني الحيا رباط اللّي ربطته حله ** بدّل غلايا باعني و ردل
استندمت هاني مالندم نتقلّى** و شكيت في فكري أنا مختل
خلّيت ما تحرث انفاض التلّه ** و حرثت في سبخة لبز و طلل
نحساب يقوى زرعها يتعلّى** تحضّرت للصّابه بكل شغُل
ضرب ملحها يبست غدت مصلّى ** لطم زرعها بعد النبات بطل
————-
لطم زرعها كيف نــــــبّت ** لا قصلت لا سعفت لا ربّت
لا داملت لا نقلت لا خلّت ** لا حصلت بين الحصايص حُصّه
ثبّتت في النّاقص بديت انثبّت ** وفّيتله ولقيت فيه الخَصّه
حبيب ال زرعلي في ضميري غُصّه...
***
حبيب ال زرعلي في الضمير غرايب ** ردف زادني بعد الهجا تعذيب
نحساب قربه ما معاه قرايب ** و نحساب حبّه ما معاه حبيب
نحساب متهني حضور وغايب ** و نحساب كيف نحرث معاه نصيب
نحساب ما درتش معاه معايب ** ديما غديري من قداه حليب
نحساب روحي مالكه بكتايب ** عندي عليه عدول و مكاتيب
عل خاطره رافع حمول صلايب ** عامين والثالث يحول قريب
عل خاطره عانيت كل مصايب ** وعل خاطره رأسي تناصف شيب
عل خاطره ما عاد نومي طايب ** سامور حبّه في الكنين لهيب
نحساب ما نلحق معاه معايب ** سوى نخصبوا والاّ الزمان جديب
حياني الحيا فارق بغير سبايب ** نسي عشرتي زي من مربي ذيب
في القلب مستاجع و دمي رايب ** نمشي جهامه ع الوطى تدبيب
صابر على عكس الزمان الخايب ** لا خير في واحد يعيش غريب
يلبس من الذّله ثلاث جبايب ** و يزيد من هم الزمان نصيب
إذا مات ما يرموا عليه عصايب ** اذا مرض ما يوجد معاه طبيب
—————-
اللّي مريض و جـــــــــــــــالي ** لازم يهز الثقل كيف أثقالي
أنا صاحبي من غير عيب أسالي** قشط جبهته و خيب معاي نَصّه
كيف زازني نحلف يزوزه بالي ** و من خاتمي نقلّع قزازة فَصّه
حبيب ال زرعلي في ضميري غُصّه...
***
حبيب ال زرع لي في ضميري غيره ** رحل بالمقامه من حذاي فر
من غير لا ردّش عليّ شيره ** نراه باعني بالخايبه و غدر
الله يهلكه و يخزيه ما أغرق بيره ** قدّاش غرّق تحتنا و حفر
فيسع جبد سفاحته مالنّيره ** قطّع حجايج صحبتي و نكر
الله يهلكه بنادم بغير سريره ** دايم أطباعه منقصه وغرر
تستصحبه و تظن فيه ذخيره ** تلقاه يعمل في عمال الذّر
يا غبن قلبي ما أكبرك من خيره ** جميل ال زرعته في الحبيب خسر
سقيته عسل لجباح يوم عصيره ** رجّع كفاي بالحدج المر
و كمل كواني ع الكنين ظفيره ** و ذرذر على جرحي ذرور الضّر
الله يرزقه بدعوى تجيه كبيره ** يتلاح ما بين البلاء و الشّر
تخليه ما بين العباد نذيره ** معيوف و ملّوح لحم خمر
يجعل أيّامه ناكده و كشيره ** مدروك في هم الزمان يكر
نوصّيك يا مغفول دير بصيره** للياش لا تربط معاهم سر
جرّبتهم ما لقيت فيهم خيره ** ملولي حشايَ موجعه وضرر
—————-
جرّبتهم قهرونــــــــــــــــــي** عاشرتهم بالباهيه خانوني
عزّيتهم بأرخص ثمن باعوني ** الدّلّال لا يشاحن ولا يتوصّى
سلامي على اللّي سامعين صغوني ** و نستغفر الله في تمام القصّة
حبيب ال زرعلي في ضميري غُصّه...